मुख्यमंत्री नको तर मग उपमुख्यमंत्री व्हा; राजकारणातील बड्या नेत्यांकडून ऑफर; सोनू सूदचा मोठा खुलासा

मुंबई: करोना काळात अनेकांची मदत केल्यानं चर्चेत आलेला अभिनेता सोनू सूद या ना त्या कारणामुळे चर्चेत असतो. करोनानंतरही त्यानं मदत करणं थांबवलं नाही. तो सामाजिक कार्यात सहभाग घेताना दिसतो. अनेक लोक त्याच्या घराबाहेर मदतीसाठी गर्दी करताना दिसतात. याच मुळे तो आता राजकारणात येणार असल्याच्या चर्चा नेहमीच रंगताना दिसतात. पण आता सोनू सूद यानं मोठा खुलासा केलाय.

राजकारणात येण्यासाठी मोठ्या ऑफर्स आल्या होत्या, असा खुलासा त्यानं केलाय. ह्यूमन्स ऑफ बॉम्बे ला दिलेल्या एका मुलाखातीत सोनू सूद यानं राजकारणावर आणि राजकारणात येण्यावर भाष्य केलं. मला मुख्यमंत्री किंवा उपमुख्यमंत्री पदाच्या ऑफर्स आल्या होत्या, असं सोनू सूद यानं म्हटलंय.

काय म्हणाला सोनू सोदू?
मला मुख्यमंत्री पदाची ऑफर आली होती, पण जेव्हा नकार दिला तेव्हा ते म्हणाले मग उपमुख्यमंत्री व्हा… हे देशातील मोठे नेते होते. त्यांनी राज्यसभेत सीट देण्याची ऑफरही दिली होती, असा मोठा खुलासा सोनू सूदनं केलाय.त्यामुळं देशातील हे नेते कोण? असा प्रश्न आता नेटकरी विचारत आहेत

आमच्या सोबत या आणि राज्यसभेचे सदस्य व्हा. तुम्हाला राजकारणात कोणत्याही गोष्टीसाठी लढायची गरज नाहीये, असं त्यांनी म्हटलं होतं. एक काळ असतो जेव्हा राजकारणातले पावरफुल लोक तुम्हाला भेटत असतात, समाजात बदल घडवण्यासाठी ते तुम्हाला प्रोत्साहन देत असतात, असंही सोनू सूदनं म्हटलं.

जेव्हा तुम्हाला फेम मिळत असतं, तुम्ही आयुष्यात पुढे जात असता. पण आपण जितक्या जास्त उंचीवर जातो तिथं ऑक्सिजनची पातळी कमी होत असते. आपल्याला उंची गाठायची असते, पण आपण त्या उंचीवर किती टिकतो हे जास्त महत्त्वाचं आहे. इंडस्ट्रीतले अनेक मोठे कलाकार आहेत, त्यांच्यासाठीही ही उंची गाठणं एक स्वप्नासारखं आहे आणि तुम्ही याला नकार देताय.

म्हणून दिला नकार
तर लोक राजकारणात दोन कारणांसाठी येतात. एक पैसा कमवायला आणि दुसरं कारण म्हणजे सत्तेसाठी. मला या दोघांमध्येही फार रस नाहीये. लोकांना मदत करण्याचा प्रश्न आहे, तर ते मी करत आहे. लोकांना मदत करायची असेल तर त्यांना भाषा, जात , धर्म विचारण्याची गरज नाहीये. मदत करताना कोणाला उत्तरं द्यायची नाहीयेत. माझं स्वातंत्र्य गमावण्याची मला भीती वाटते, असं सोनू सूदनं स्पष्ट केलंय.